চাকৰিৰ ইণ্টাৰভিউ বা সাক্ষ্যাতকাৰ হয়তো বহুতেই ইতিমধ্যে দিছে বা বহুতেই এতিয়ালৈকে দি পোৱা নাই । ইণ্টাৰভিউ দিয়া বহুতেই হয়তো সফল ভাৱে উত্তীৰ্ণ হৈছে আৰু বহুতেই সফলতা পোৱা নাই । মই এতিয়ালৈকে ১২ টা ইণ্টাৰভিউ দিছো (টেলিফ’নিক ইণ্টাৰভিউ বাদ দি) আৰু তাৰ ৮ টা ইণ্টাৰভিউ সফলতাৰে উত্তীৰ্ণ হৈছো । ইয়াৰ উপৰিওঁ দুবাৰ ইণ্টাৰভিউ বোৰ্ডৰ সদস্য হোৱাৰ অভিজ্ঞতা লভিছো । ইণ্টাৰভিউত সফলতা লাভ কৰা কোনো নিৰ্দিষ্ট ফৰ্মূলা নাই, কিন্তু অভিজ্ঞতাৰ পৰা লিখিব খুজিছো কিছু কথা ।
১) যদি লিখিত পৰীক্ষাৰ পিছত ইণ্টাৰভিউ থাকে তেন্তে ইণ্টাৰভিউত জ্ঞানৰ পৰীক্ষা বিশেষ কৰা নহয়, নিয়োগকৰ্তাৰ (Employer) ৰ প্ৰয়োজন কোন গৰাকী প্ৰাৰ্থীয়ে পূৰাব পাৰিব সেয়া লক্ষ্য কৰা হয় ।
২) প্ৰশ্নৰ উত্তৰ কি দিছে তাতকৈ কেনেকে দিছে সেয়া অধিক গুৰুত্বপূৰ্ণ ।
৩) প্ৰশ্নবোৰৰ উত্তৰ দিওঁতে ভাৱি-চিন্তি এইবাবেই দিব লাগে, নহলে পৰৱৰ্ত্তী প্ৰশ্নত হয়তো নিজৰ উত্তৰত নিজেই বান্ধ খাই যাব ।
৪) সকলো প্ৰশ্নৰ উত্তৰ জনা সম্ভৱ নহব পাৰে, ভুল উত্তৰ দিয়াতকৈ নাজানো বুলি কোৱাটো অধিক ফলপ্ৰসূ । কিবা প্ৰশ্ন ভালকৈ বুজি নাপালে, আকৌ এবাৰ সুধিব পাৰে ।
৫) কিধৰণে আপুনি নিজকে উপস্থাপন কৰিছে সেয়া বহুত গুৰুত্বপূৰ্ণ । সাজ-পোচাক মাৰ্জিত, ভদ্ৰ ব্যৱহাৰ আৰু মাৰ্জিত শব্দৰ প্ৰয়োগ আদি উল্লেখযোগ্য । নিজৰ লগত নিয়া ডকুমেণ্টৰ ফাইলটো নিজৰ কোলাতে ৰাখিব আৰু ডকুমেণ্টবোৰ মেট্ৰিকৰ পৰা আৰম্ভ কৰি এটা ক্ৰমত সজাই নিব যাতে চাব বিচাৰিলে সহজে দেখাব পাৰে ।
৬) উত্তৰ দিওঁতে স্পষ্ট আৰু আত্মবিশ্বাস ফুটি উঠিব লাগে, অলাগতিয়াল কথা বা যদি বাখ্যা বিচৰা নাই তেন্তে দীঘলীয়া উত্তৰ নিদিয়াটোৱে মংগল ।
৭) যিটো পদৰ বাবে ইণ্টাৰভিউ দিছে তাৰ বিষয়ে আৰু নিয়োগকাৰী সংস্থাটোৰ ওঁপৰত জ্ঞান থকাটো বাঞ্চনীয় ।
৮) যদি নিয়োগ প্ৰক্ৰিয়াটোত কেৱল ইণ্টাৰভিউ থাকে তেন্তে পদবীৰ লগত খাপ খাব পৰা সাময়িক ঘটনা-প্ৰৱাহ আৰু বিষয়বস্তু বা যি বিষয়ত কলেজ বা ইউনিভাৰ্ছিটিত পঢ়া-শুনা কৰিছে তাৰ ওপৰত দখল থকাটো আশা কৰে ।
৯) যদি ইতিমধ্যে কোনো পদবীত চাকৰি কৰি আছে তেন্তে অভিজ্ঞতাৰ কথা আৰু বৰ্তমানৰ চাকৰিৰ কথাটো প্ৰায়ে সোধা দেখা যায় ।
১০) ইণ্টাৰভিউ বোৰ্ডৰ ব্যক্তি গৰাকীয়ে কি দৃষ্টিভংগীৰ পৰা প্ৰশ্নটো সুধিছে সেয়া জানিব পাৰিলে উত্তৰটো দিব বহুত সুবিধা হয় ।