কালি লগৰ এজনে ফোনত কথা পাতোতে সুধিলে, কিহেৰে ভাত খালা বুলি? মই কলোঁ ষ্টীম ৰাইচ (Steam rice), য়েলো ডাল (yellow dal), লগত ধনীয়া পাত দি বনোৱা স্মেছদ প’টেটো (smashed potato) আৰু প্ৰ’টিন চালাড।  সি ক’লে, ৱাহ- ধুনীয়া খানা। মইও অ’ বুলি কৈ থৈ দিলো। যদি সহজ ভাষাত ক’লোহেতেন তেতিয়া হ’লে আলু-পিটিকা আৰু ডালি ভাত, লগত তিয়হ, কেচা বুট, গাজৰৰ চালাড। সহজ ভাষাত কথা ক’লে কিছুমানে বেছি সাধাৰণ (Ordinary) বুলি ভাৱে, সেয়ে কেতিয়াবা অলপ চলপ আজিকালি দুই-এটা দাত ভঙা ইংৰাজী শব্দ লগাই সহজ কথাটো জটিল কৰি কওঁ। গুৱাহাটীত থাকি প্ৰায়ে মুখামুখি হোৱা এটা প্ৰশ্ন, ফ্লেট লৈছানে অথবা গুৱাহাটীত মাটি-বাৰী কৰিলানে। আগতে উত্তৰ দিছিলো, নাই কিনা অথবা কিনিব পৰা সামৰ্থ্য হোৱা নাই অথবা গাৱঁত ঘৰ সাজিছোৱে ইত্যাদি ইত্যাদি। আজিকালি কোনোবাই সুধিলে উত্তৰ কেনেকৈ দিওঁ জানেনে! মোৰ এইট বি,এইচ কে (8 BHK) ঘৰটো কাণ্ট্ৰী চাইড (Country Side) ৰ পিনে সাজিছো, ৰিভাৰ ফেচিং (River Facing), ৯০% অ’পেন স্পেছ আৰু যাষ্ট ২ আৱাৰছ ( hours) ড্ৰাইভ ফ্ৰম গুৱাহাটী। প্ৰশ্ন সোধাজনে এইবাৰ অলপ সময় ভাৱি কয়, ৱাও, ৰিভাৰ ফেচিং! এবাৰ যাব লাগিব দেই আপোনাৰ ঘৰত ইত্যাদি ইত্যাদি। আমিও সন্তোষ পাওঁ তেতিয়া। এয়াই শব্দৰ খেলা।

            উপহাৰতকৈ আজিকালি উপহাৰ বন্ধা কাগজখন বেছি গুৰুত্বপূৰ্ণ। পূৰণি বাতৰি কাগজেৰে মেৰিয়াই দিয়া কাহৰ কাহী-বাটি যোৰ আমি বিয়াত উপহাৰ দিবলৈ অলপ আখেজা আখেজা লাগে, কিন্তু ৰঙীন চিকমিকাই থকা কাগজেৰে কাচৰ বাতিৰ ছেট দিবলৈ আমাৰ আখেজা আখেজা নালাগে। সেয়াই বাস্তৱ। ঠিক তেনেদৰে বহুতকে যেতিয়া সোধো, ল’ৰাটোক কিয় সেইখন দামী স্কুলত এডমিশ্যন দিলা, বেছিভাগৰেই যুক্তিসন্মত উত্তৰ নাথাকে। স্কুল এখন কিমান ভাল বা কিমান বেয়া সেয়া কিহেৰে আমি মূল্যায়ন কৰিম আমি বিশ্লেষণ কৰিবৰ হ’ল। আই ফোনৰ (I phone) ৰ দাম কিয় বেছি আমি জানোনে অথবা আই ফোন ব্যৱহাৰ কৰা সকলে কি অতিৰিক্ত সুবিধা লাভ কৰে আপুনি জানেনে? টিভিৰ পৰ্দাত দেখি থকা সকলো বস্তুৱেই সচাঁনে, ইংৰাজীত সলসলীয়াকৈ কথা কোৱাজন সচাঁকৈ স্মাৰ্টনে ইত্যাদি ইত্যাদি।