কিছুদিন পিছত হায়াৰ ছেকেণ্ডাৰী পৰীক্ষাৰ ৰিজাল্ট দিব। বহুতেই হয়তো ইতিমধ্যে পৰিকল্পনা কৰি থৈছে, ক’ত পঢ়িব, কি পঢ়িব ইত্যাদি। এই পৰীক্ষাৰ পিছত কি পঢ়িব আৰু ক’ত পঢ়িব সেয়া জীৱনৰ বাবে অতি গুৰুত্বপূৰ্ণ। এটা সময়ত ছাত্ৰ-ছাত্ৰীৰ হাতত বহুত বেছি বিকল্প নাছিল সেয়ে ভুল কৰাৰো অৱকাশ বেছি নাছিল। আজিৰ তাৰিখত চৰকাৰী কলেজ-ইউনিভাৰ্ছিটিৰ উপৰিও বহুতো ব্যক্তিগত খণ্ডৰ কলেজ আৰু বিশ্ববিদ্যালয়ে উচ্চশিক্ষাৰ পৃথিৱীখনত ভৰি থৈছে। নতুন নতুন কোৰ্চ কিছুমানো আৰম্ভ কৰিছে কলেজ-ইউনিভাৰ্ছিটিবোৰে। অভিভাৱক আৰু ছাত্ৰ-ছাত্ৰীসকলে মন কৰিবলগীয়া দুটামান কথা তলত উল্লেখ কৰিলো-
১) কলেজ বা ইউনিভাৰ্ছিটিত নামভৰ্তি কৰাৰ আগতে প্ৰথমতেই কলেজ বা ইউভাৰ্ছিটিখন স্বীকৃতিপ্ৰাপ্ত (Recognized হয়নে নহয় জানি লওক। আমাৰ দেশত বিশ্ববিদ্যালয় অনুদান আয়োগে (UGC) বিশ্ববিদ্যালয় সমূহক স্বীকৃতি দিয়ে। য’ত নামভৰ্তি কৰিব সিহতৰ ৱেবছাইটৰ তথ্যৰ ওপৰতে নিৰ্ভৰ নকৰিব বা গুগলকো বিশ্বাস নকৰিব। UGC ৰ ৱেবচাইটত গ’লে সমস্ত তথ্য পাই যাব।
২) ভাৰতত কলেজ বা বিশ্বাবিদ্যালয়ৰ ৰেংকিঙৰ বিষয়ে জানিবৰ বাবে কেন্দ্ৰীয় চৰকাৰৰ NIRF ৰ ৱেবচাইট চাব পাৰে। কোৰ্ছ, শিক্ষক, ছাত্ৰ-ছাত্ৰী আদিৰ বিষয়ে তথ্য জানিবলৈ AISHE ৰ ৱেবছাইত চাব পাৰে।
৩) আজিকালি বহু কলেজ- ইউনিভাৰ্ছিটিয়ে (বিশেষকৈ ব্যক্তিগত খণ্ডৰ) ছাত্ৰ-ছাত্ৰীক নামভৰ্তি কৰাবৰ বাবে বহু অৰ্ধসত্য তথ্য ডাঙি ধৰে, সেইবোৰ অলপ Cross-Check কৰি ল’ব পাৰিলে ভাল। বিশেষকৈ স্কলাৰশ্বীপ (Scholarship), চাকৰি দিয়া (Placement), পুৰস্কাৰ (Award) আদি খবৰবোৰ যিমান পাৰি উৎস বা যিজনে লাভ কৰিছে তেওঁৰ পৰা ল’ব পাৰিলে ভাল।
৪) যিসকলে মেডিকেল পঢ়িবলৈ বিদেশলৈ যাব, তেওঁলোকে এটা বস্তু ধ্য়ান দিবযে, সেইখন দেশৰ বা সেইখন কলেজৰ পাঠ্যক্ৰম (course structure) আমাৰ দেশৰ লগত মিলে। এই সন্দৰ্ভত বিশদ জানিবলৈ ভাৰত চৰকাৰৰ মেডিকেল কাউন্সিলৰ ৱেবছাইট চাব পাৰে।
৫) যিসকলে কোচিং (coaching) আদিৰ পৰিকল্পনা কৰিছে সেয়া মেডিকেল, ইঞ্জিনীয়াৰিং অথবা প্ৰশাসনিক সেৱা অথবা CUET ৰ বাবে, তেওঁলোকে কোচিং চেণ্টাৰবোৰৰ কেৱল ৰমকজমক বিজ্ঞাপন দেখিয়ে নামভৰ্তি নকৰিব। বেনাৰ- হ’ৰ্ডিঙত লাগি থকা ৰিজাল্টবোৰ সদায় সঁচা নহবও পাৰে। বেনাৰত লাগি থকা ফ’টোখন তেওঁলোকৰ নিজৰ ছাত্ৰ বা ছাত্ৰী নহবও পাৰে। কিমানজন সফল হৈছে খবৰটো লোৱাতকৈ কিমান শতাংশ সফল হৈছে সেয়া অধিক গুৰুত্বপূৰ্ণ। যিমানদূৰ সম্ভৱ, ইতিমধ্যে পঢ়ি অহা ছাত্ৰ-ছাত্ৰী, অভিভাৱকৰ লগত কথা পাতক আৰু সফলতা লাভ কৰা ছাত্ৰ বা ছাত্ৰী গৰাকীক লগ কৰিবলৈ চেষ্টা কৰক।
৬) কলেজ-বিশ্ববিদ্যালয়ে লাভ কৰা বিভিন্ন পুৰস্কাৰ দাতাৰ খবৰো ল’ব পাৰে। ছাত্ৰ-ছাত্ৰীয়ে বিভিন্ন ৰাষ্টীয়-আন্ত:ৰাষ্ট্ৰীয় প্ৰতিযোগিতাত লাভ কৰা পুৰস্কাৰ সমূহৰ খবৰ বিভিন্ন শিক্ষানুষ্ঠানে প্ৰচাৰ কৰা দেখা যায়। এই প্ৰতিযোগীতাসমূহ কোনোবা স্বীকৃতিপ্ৰাপ্ত অনুষ্ঠানে আয়োজন কৰা অছিল নে নাছিল সেয়াওঁ চাব পাৰে।
৭) যিখন কলেজ বা ইউনিভাৰ্ছিটিত নামভৰ্তি কৰিব সেইখনৰ NAAC ৰ স্বীকৃতি থাকিলে ভাল, সেয়া চৰকাৰীয়েই হওক কিম্বা বেচৰকাৰীয়েই হওঁক।
সকলো কেৰিয়াৰেই ভাল কেৰিয়াৰ। ভয় খুৱাবলৈ নহয়, কেৱল সজাগ কৰাৰ উদ্দেশ্য কৰি এইখিনি কথা লিখিলো।