পৰীক্ষাত ল’ৰা বা ছোৱালী এগৰাকীয়ে ১০০ ৰ ভিতৰত ১০০ নম্বৰ পোৱা মানে আমি কি বুজো! মই যিমান দূৰ বুজি পাওঁ- ১০০ ৰ ভিতৰত যদি ১০০ নম্বৰ পাইছে তেন্তে সেই ল’ৰা বা ছোৱালীজনীয়ে সেইটো বিষয়ৰ ওপৰত সম্পূৰ্ণ দখল আছে বা জ্ঞান আছে। আমাৰ বহু ল’ৰা ছোৱালীয়ে স্কুল বা বোৰ্ডৰ পৰীক্ষাত ভাল নম্বৰ লাভ কৰে, কিন্তু একেই চিলেবাছৰ ওপৰত ভিত্তি কৰি অনুষ্ঠিত হোৱা প্ৰতিযোগীতামূলক পৰীক্ষাত ভাল নম্বৰ লাভ কৰিব নোৱাৰে।
যিসকল ল’ৰা-ছোৱালী ক্লাছ নাইন বা টেনত পঢ়ি আছে অথবা নাইন-টেনত পঢ়ি থকা ল’ৰা ছোৱালীৰ অভিভাৱক আছে, তেওলোকে নিশ্চয়কৈ গম পাইছেযে অহাবাৰৰ পৰা ক্লাছ নাইন-টেনৰ পৰীক্ষাত প্ৰশ্নবোৰ অলপ বেলেগ ধৰণৰ হ’ব। এই সম্পৰ্কে চৰকাৰী নিৰ্দেশনাও জাৰি কৰিছে। কিতাপৰ পৰা পোনপটীয়া প্ৰশ্ন হয়তো নাহিবও পাৰে, প্ৰশ্নবোৰ অলপ হয়তো আওপকীয়া হ’ব পাৰে আৰু ই বিষয় এটাৰ পৰা উদ্ভৱ হ’ব পৰা যিকোনো প্ৰশ্ন হ’ব পাৰে। প্ৰথম দেখাত হয়তো ছিলেবাছৰ বাহিৰৰ যেন লাগিলেও কিন্তু ই ছিলেবাছৰ ভিতৰৰে হ’ব। ইয়াৰ ফলত ল’ৰা বা ছোৱালীজনীৰ সামগ্ৰিক শিক্ষা এটাৰ মূল্যায়ন হ’ব বুলি ধাৰণা কৰা হৈছে। নতুন শিক্ষা নীতিয়েও এনেকুৱা ফলাফল থকা শিক্ষা (Outcome base learning)ত গুৰুত্ব দিছে।
সেয়েহে ক্লাছ নাইন বা টেনত ভাল নম্বৰ পাবলৈ হ’লে ‘কনচেপ্ট’ ভাল হ’ব লাগিব বা বিষয়বস্তুৰ ওপৰত দখল থকাটো জৰুৰী। সৰু সৰু ক্লাছত পঢ়ি থকা ল’ৰা-ছোৱালীবোৰক বিষয়বস্তু দখল অনাটো এতিয়া অত্যন্তু জৰুৰী, তেতিয়াহে পৰৱৰ্তী সময়ত তিস্থিব পাৰিব। মুখস্থ বিদ্যাৰ যতি পৰিব বুলি কিছু পৰিমাণে ধাৰণা কৰিব পাৰি। উদাহৰণ- আমি যদি সোধো ভাৰতৰ প্ৰথমটো তেল শোধনাগাৰ ক’ত অৱস্থিত বুলি, সকলোৱে উত্তৰ দিব- ডিগবৈত বুলি। যদি সোধা যায়, ভাৰতৰ প্ৰথমটো তেল শোধনাগাৰ কোনখন জিলাত অৱস্থিত, আমি বহুতেই হয়তো এবাৰলৈ ভাৱিব লাগিব। ত্ৰিভুজৰ তিনিটা বাহু আছে সকলোৱে জানে, কিন্তু তিনিটা বাহু থকা বাবেইযে ত্ৰিভুজ নামটো হ’ল সেয়া বহুতকে শিকোৱা নহয়।
প্ৰতিযোগিতাৰ পৃথিৱীত নম্বৰ আৰু জ্ঞান দুইটাই গুৰুত্বপূৰ্ণ।
যিয়েই নহওক নতুন ব্যৱস্থাৰ বাবে সাজু হওক।