এলপি স্কুলত পঢ়ি থাকোতে মোৰ ৰোল নম্বৰ এক আছিল। যেতিয়া হাইস্কুলত উঠিলো বিভিন্ন এলপি স্কুলৰ পৰা ল’ৰা-ছোৱালীবোৰ আহিল, মোৰ ৰোল নম্বৰ তিনি হ’ল আৰু ক্লাছ চিক্সৰ পৰা মেট্ৰিকলৈকে একেই থাকিল। মেট্ৰিকত ফাৰ্ষ্ট ডিভিজন পাই দুখনত লেটাৰ নম্বৰ পালো। ৰিজাল্ট তুলনামূলকভাৱে ভাল সেয়ে, সকলোৰে ফূৰ্তি, মোৰো ফূৰ্তি।

হায়াৰ ছেকেণ্ডাৰী চাইন্সত যেতিয়া এডমিশ্যন ল’লো তেতিয়া দেখিলো বেছিভাগেই ফাৰ্ষ্ট ডিভিজন পোৱা আৰু কেবাজনেও মোতকৈ নম্বৰ বেছি পোৱা। যিয়েই নহওক হায়াৰ ছেকেণ্ডাৰী ফাৰ্ষ্ট ডিভিজনত পাছ কৰাৰ পিছত আৰু বেছি ফূৰ্তি। আমাৰ পৰিৱেশটো এনেকুৱা আছিলযে ফাৰ্ষ্ট ডিভিজন পোৱাটোৱেই ডাঙৰ কথা।

ইঞ্জিনীয়াৰীং পঢ়িবৰ বাবে এণ্ট্ৰেন্স পৰীক্ষা দিলো, সফল নহলো। সেয়া মই বুজিব পৰা প্ৰথমটো বিফলতা। তেতিয়াহে অনুভৱ কৰিলো, পৃথিৱীখনত প্ৰতিযোগিতা কিমান! যিয়েই নহওক বিএচচিত যেতিয়া কম্পিউটাৰ চাইন্সত মেজৰ লৈ পঢ়িব আৰম্ভ কৰিলো মোৰ ৰোল নম্বৰ হ’ল চাব্বিছ। অসমৰ বিভিন্ন ঠাইৰ পৰা হায়াৰ ছেকেণ্ডাৰীত ভাল ভাল ৰিজাল্ট কৰি আহিছে ল’ৰা-ছোৱালীবোৰে। ইউনিভাৰ্ছিটিতো মাত্ৰ দহখন ছিট, টেনশ্যন হ’ল। ভাগ্যইয়ো অলপ সহায় কৰিলে। এন্ট্ৰেন্স পৰীক্ষাটোত পাছ কৰি ইউনিভাৰ্ছিটিত ছিটতো পাই এমএচচি পাছ কৰিলো। ফাইনেল ছেমিষ্টাৰৰ পৰীক্ষা দিয়াৰ আগতে আমাৰ কেম্পাছ ৰিক্ৰুইমেণ্ট আৰম্ভ হ’ল। মই ফাইনেল পৰীক্ষা দিয়াৰ আগতেই ইনফ’চিচ কোম্পেনীৰ চাকৰিৰ অফাৰ লেটাৰ পাই গ’লো। আত্মবিশ্বাস বাঢ়ি গ’ল। ট্ৰেইনিঙৰ বাবে ইনফ’চিচৰ যেতিয়া মহীশূৰ কেম্পাছত জইন কৰিলো তেতিয়া গম পালো আমাৰ বেটছত ৩২ জন নতুন ল’ৰা-ছোৱালী জইন কৰিছে। ভাৰতবৰ্ষৰ বিভিন্ন ঠাইৰ পৰা সিহত আহিছে। সিহতৰ কোনোবাই যদি ইউনিভাৰ্ছিটিৰ গোল্ড মেডেলিষ্ট কোনোবাজনে তেতিয়াই ৭০-৮০% নম্বৰে পোৱা। বুজি উঠিলো প্ৰতিযোগিতা কিমান বেছি।

মই কিয় এইখিনি কথা লিখিলো জানেনে-

গাঁ‌ৱত যেতিয়া হাইস্কুলত পঢ়ি আছিলো, এনে লাগিছিল ময়েই আটাইতকৈ চোকা ল’ৰাটো। যিমানে বৃত্তটোৰ বাহিৰলৈ ওলাই আহিলো, সিমানে অনুভৱ কৰিলো মইটো ক্ষুদ্ৰ ধূলিকণা মাত্ৰ। এই প্ৰতিযোগিতাৰ পৃথিৱীত তিষ্ঠি থাকিবলৈ হ’লে মানসিকভাৱে নিজকে প্ৰস্তুত কৰি তুলিবই লাগিব। বাহিৰৰ পৃথিৱীখনত কি চলি আছে আমি তাৰে খবৰ ৰাখিবই লাগিব। নহ’লে আমি হঠাৎ যেতিয়া বৃত্তটোৰ পৰা বাহিৰত ওলাই আহো, পৃথিৱীখন আচিনাকী হৈ পৰে। বহুতেই এই প্ৰতিযোগিতাত তিস্থিব নোৱাৰে, গাঁ‌ৱৰ ভাল চোকা ল’ৰাটো বাহিৰত আহি হেৰাই যায়। আত্মবিশ্বাসী হ’বই লাগিব কিন্তু অধিক আত্মবিশ্বাসী (over confident) নহয়। আনে যদি পাৰিছে ময়ো পাৰিম কিন্তু, মোক প্ৰত্যাহ্বান জনাবলৈ বহু যোগ্য প্ৰতিদণ্ডী আছে সেইটো মনত ৰাখিব লাগিব।