সিদিনা সুৰা কোম্পেনী এটাত চাকৰি কৰা বন্ধু এজনে কৈছিলে- যোৱা চাৰি-পাছ বছৰত হেনো সিহতৰ কোম্পেনীৰ সুৰাৰ বিক্ৰী প্ৰায় ছয়-সাত গুণ মান বৃদ্ধি পাইছে। ৰাজ্যৰ কাৰণে ৰাজহ আৰু অৰ্থনীতিত নিশ্চয়কৈ ই এক ভাল খবৰ। নিৰ্ভৰযোগ্য তথ্য অনুসৰি, চৰকাৰী ভাৱে অনুজ্ঞাপত্ৰপ্ৰাপ্ত সুৰাৰ দোকানৰ সংখ্যাও বৃদ্ধি পাইছে বহুগুণে আৰু এতিয়া বিলাতী সুৰা অসমৰ যিকোনো ঠাইতে দুৰ্লভ নহয়। চৰকাৰী ভাৱে যিহেতু অনুজ্ঞাপ্ৰাপ্ত সুৰা-বিপনীৰ সংখ্যা বৃদ্ধি কৰি প্ৰসাৰৰ দিহা কৰা হৈছে সেয়ে ইয়াৰ পৰা সামাজিক প্ৰভাৱ সমূহ চাগে নিশ্চয়কৈ বিশ্লেষণ কৰা হৈছে। কিছুদিন আগতে বাতৰিকাকতত পঢ়িছিলো সুলভ মূল্যৰ দোকানবোৰেও হেনো আদালতত আবেদন কৰিছে তেওঁলোকক সুৰা বিক্ৰী কৰিবলৈ দিব লাগে বুলি, যেন সুৰাৰ এক আন্দোলন হ’বলৈ গৈ আছে। যোৱা কিছু বছৰত লক্ষ্য কৰিছো, আমাৰ গাওঁ ল’ৰাবোৰেও সুৰাপানৰ এই আন্দোলনত সক্ৰিয়ভাৱে অংশগ্ৰহন কৰিছে। আগতে আমি গাৱঁত মদ খোৱা মানুহ বুলি কলে দুই-এজনক চিনি পাইছিলোঁ এতিয়া সেই সময় অতীত। অৱশ্যে সময় সলনি হ’ল, আগৰ দিনত মদ খাইছিলে এতিয়া ড্ৰিংকছ কৰে।

            এতিয়া মূল বিষয়বস্তুলৈ আহোঁ। চৰকাৰীভাৱে যিহেতু সুৰাৰ প্ৰসাৰ আৰু বিক্ৰীৰ ব্যৱস্থা কৰা হৈছে সেয়েহে কেইটামান বিষয়ত চৰকাৰৰ আৱকাৰী বিভাগে গুৰুত্ব দিব লাগে বুলি মই অনুভৱ কৰিছো। সুৰাপান এতিয়া আৰু লুকাই থকা বিষয় হৈ থকা নাই বা লাজ কৰিবলগীয়া বিষয় হৈ থকা নাই, কিন্তু সামাজিক আৰু ৰাইজৰ স্বাস্থ্যৰ প্ৰতিও চৰকাৰৰ আৱকাৰী বিভাগে উদাসীন হৈ থাকিব নোৱাৰে।

অসম চৰকাৰৰ আৱকাৰী বিভাগে মদ কেনেকৈ খাব লাগে, কিমান খাব লাগে তাৰ ওপৰত ঠায়ে ঠায়ে কৰ্মশালা এখন পাতিব লাগে। যিসকলে সুৰাপান কৰিব বিচাৰে তেওলোকে এটা নিৰ্দিষ্ট প্ৰশিক্ষণ (Orientation) লৈ লাহে লাহে সুৰাপান কৰিব আৰম্ভ কৰিব পাৰে, পিছলৈ হয়তো মদ খোৱাৰ অনুজ্ঞাপত্ৰৰ কথাও ভাৱিব পাৰে। মিজোৰামত সুৰাপান কৰিবলৈ অনুজ্ঞাপত্ৰ ল’ব লাগে। এজন ল’ৰা বা এজনী ছোৱালীয়ে কিমান মদ খালে স্বাস্থ্যৰ ক্ষতি নহয় অথবা কিমান পেগ মদ খালে গাড়ী-বাইক চলাব নোৱাৰে সেয়া জানিব আৰু বুজিব লাগিব। সময়ে সময়ে সুৰাপান কৰা ব্যক্তি সকলৰ স্বাস্থ্য পৰীক্ষা কৰি থাকিব লাগে, যেনেকৈ গৰ্ভৱতী মহিলাসকলৰ এটা নিৰ্দিষ্ট সময়ৰ মূৰে মূৰে স্বাস্থ্য পৰীক্ষা কৰে। যিহেতু সুৰাপায়ী সকলে ৰাজভৰাললৈ অৱদান আগবঢ়াই আহিছে তেওঁলোকৰ কল্যাণৰ বাবে এইখিনি খৰছ চৰকাৰে নিশ্চয়কৈ কৰিব পাৰে। কেৱল সেয়ে নহয়, সুৰাপান কৰি নিজক কেনেকৈ স্থিৰ বা নিয়ন্ত্ৰিত (Control) কৰি ৰাখিব পাৰি, কেনেকৈ কাজিয়াত লিপ্ত নোহোৱাকৈ থাকিব পাৰি অথবা নিজৰ সন্মান অক্ষুণ্ণ ৰাখিব পাৰি তাৰ ওপৰত কৰ্মশালা পাতি সজাগতা সৃষ্টি কৰি থাকিব লাগে। আজিৰ তাৰিখত কথাখিনি হয়তো অলপ আখেজা আখেজা লাগিছে কিন্তু সময় থাকোতেই পৰিকল্পিতভাৱে যদি আগবঢ়া নাযায়, তেন্তে ই পিছলৈ সামাজিক বিশৃংখলা সৃষ্টি কৰিব তথা আৰ্থিকভাৱেও বহুতকে জুৰুলা কৰি পেলাব। মই সুৰাপানৰ বিৰোধী নহয় কিন্তু নিয়ন্ত্ৰন কৰিব নোৱাৰাকৈ সুৰাপান কৰাৰ ঘোৰ বিৰোধী।