ষ্ট্ৰেছ হেণ্ডেল (Stress Handle) কৰিবলৈ শিকক, নহ’লে ই আপোনাক বিপদত পেলাব। যোৱা কেইমাহ মানত আত্মহত্যা, প্ৰেছাৰ ষ্ট্ৰোক, হাৰ্ট এটেক আদিৰ ঘটনা ইমান শুনিছো, শুনি ভাৱিবলৈ বাধ্য হৈছো আমিও এদিন ইয়াৰ চিকাৰ হম নেকি! মানুহে কিয় জানোঁ ইমান টেনশ্যন লয়, সমস্যা দেখোন সকলোৰে আছে, সেইবুলি টেনশ্যন লৈয়ে থাকিম নেকি! জীৱনটো স্বাভাৱিক ভাৱে জীয়াবলৈ যদি চেষ্টা কৰা নাযায়, বিপদ অনিবাৰ্য।
১) বহুতেই নিজৰ সমস্যাৰ কথা খুলি নকয় অথবা কাক ক’ব সেই মানুহজন বিচাৰি নাপায়। সমস্যাবোৰ বা টেনশ্যনবোৰ আনৰ আগত খুলি ক’ব পাৰিলে আধা সমস্যাৰ সমাধান হৈ যায় বুলি গৱেষণাই কয়।
২) অফিছ বা কৰ্মক্ষেত্ৰত মূৰব্বী বা বছ(Boss)গৰাকীৰ ওপৰত নিৰ্ভৰ কৰে বাকীসকলৰ জীৱনৰ বহু সমস্যা আৰু টেনশ্যন। মানসিক চাপৰ বাবে আত্মহত্যা কৰা অধিকসংখ্যক কৰ্মচাৰীকে মূৰব্বীগৰাকীয়ে ইচ্ছা কৰাহ’লে বচাব পাৰিলেহেতেন বুলি তথ্যত প্ৰকাশ। অফিছৰ বছগৰাকীতকৈ নিজৰ ঘৰৰ মানুহ আৰু বন্ধু-বান্ধৱীক অধিক প্ৰাধান্য দিয়াৰ চেষ্টা কৰক। টেনশ্যনৰ পৰা কিছু মুক্ত হ’ব আৰু পৃথিৱীখন সূন্দৰ হ’ব।
৩) এয়া প্ৰতিযোগিতাৰ যুগ। আজি যি আছে তাতকৈ বেছি বিচৰাটো বা আজি যি স্থানত আছে তাতকৈ ওপৰলৈ যাব বিচৰাটো হয়তো ভুল নহয়। ভুল তেতিয়াই হয়, যেতিয়া প্ৰতিযোগিতাত দৌৰি থাকোতে আমি পাহৰি যাওঁ- ‘আমি কিয় দৌৰি আছিলোঁ’।
৪) নোপোৱাৰ দুখে কেতিয়াবা হেচা মাৰি ধৰিলে, তললৈ চাওক বা আপোনাতকৈ দুৰ্বলজনলৈ চাওক। আপোনাকযে ঈশ্বৰে এটা সুষ্ঠ মন আৰু শৰীৰ দিছে তাৰ বাবে কৃতজ্ঞ হওক।
৫) সদায় সুখী হ’ব লাগে বুলি কথা নাই, সদায় প’জিটিভ হ’ব লাগে বুলিও কথা নাই, বেছি সুখী হোৱাৰ অভিনয় কৰিবলৈ গৈ দুখী নহ’ব। স্বাভাৱিক ভাৱেই জীয়াই থাকক।
৬) আনক দেখুৱাবলৈ কাম কৰা বাদ দিয়ক, নিজে যি তাকে লৈ গৌৰৱ কৰক। প্ৰয়োজনতকৈ বেছি ‘লেবেল’ দিলে বা নিজক লুকুৱাই অভিনয় কৰিলে এদিন নহয় এদিন ধৰা পৰিবই আৰু সিদিনা ষ্ট্ৰেছ বাঢ়ি যাব।
৭) ভাৰ্চুৱেল পৃথিৱীখন ভাৰ্চুৱেল হৈয়ে থাকিব দিয়ক। ফেচবুক, ইনষ্টাগ্ৰামৰ কথাবোৰে সদায় নকয় সঁচা কথা। আপুনি মেছেজত কাৰোবাৰ লগত যি আন্তৰিকতাৰে কথা পাতিছে, সিমূৰৰ মানুহজনে সেই একেই আন্তৰিকতাৰে নাপতিবও পাৰে। ধেমালি কৰি আপোনাক ‘ভাল লাগে’ বুলি কোৱা কথাষাৰ হয়তো আপুনি চিৰিয়াছ বুলি লৈ ল’লে সমস্যাৰ গজালি মেলে।
৮) মেডিকেল, ইঞ্জিনীয়াৰিং অথবা চিভিল চাৰ্ভিছ আদিৰ দৰে প্ৰতিযোগিতা মূলক পৰীক্ষাৰৰ প্ৰস্তুতি চলাই থকা শিক্ষাৰ্থীসকলে তেওঁলোকৰ নিজৰ সামৰ্থতা জনা উচিত আৰু বিফল হ’লে কেতিয়া নিজকে এই প্ৰতিযোগিতাৰ পৰা আতৰাই (quit) আনিব লাগে সেয়া বুজি পোৱা উচিত।
সকলোৰে সমস্যা বেলেগ বেলেগ। কাৰোবাৰ যদি ডাঙৰ চাকৰি আছে, তেওঁৰ ছুটি নাই। কাৰোবাৰ যদি সময়ত বিয়াখন পাতিব নোৱাৰাৰ দুখ কাৰোবাৰ আকৌ বিয়া পাতি ভুল কৰিলো বুলি পোৱা দুখ। কাৰোবাৰ হাতত যদি পইচা নাই, কাৰোবাৰ হাতত সময় নাই। সমস্যাৰ কথা লিখি গ’লে শেষেই নহ’ব। মানসিক চাপ আহিলে সোনকালেই কাৰোবাৰ লগত আলোচনা কৰক আৰু বিশ্বাস কৰক আপোনাৰ জীৱন বহুহাজাৰজনতকৈ ভাল আৰু সুখৰ। ‘মানুহে কি ক’ব’ সেই কথাটো এৰাই চলক। ভুল হ’ব পাৰে জীৱনত- শুধৰণিৰ সুবিধাও পাব। পৰিয়াল আৰু বন্ধু-বান্ধৱীক অলপ সময় দিয়ক ‘ষ্ট্ৰেছ হেণ্ডেল’ হৈ যাব। সৰু সৰু কথাৰ বাবে আনক বেয়া পাবলৈ এৰি দিয়ক। আনক হিংসা কৰিলে নিজৰ লাভ হোৱা কেতিয়াও দেখা নাই। শেষত সকলোকে কৈছো- ভালে থাকক, কুশলে থাকক।