মই যেতিয়া প্ৰথমটো চাকৰি কৰিছিলো ইনফ’চিচ কোম্পেনীত, তেতিয়া দেখিছিলো কোম্পেনীৰ ভাইচ প্ৰেছিডেণ্ট বা কাণ্ট্ৰী-হেডবোৰক। এনে অনুভৱ হৈছিল তেওলোকেই পৃথিৱীৰ শক্তিশালী মানুহবোৰ, চাৰিওকাষে তেওলোকৰ ধেৰ ফল’ৱাৰ। মনত জাগিল মইয়ো যদি কেতিয়াবা সেইখন চকীত বহিব পাৰিলোহেতেন। কটন কলেজত যেতিয়া কিছুদিনৰ বাবে শিক্ষকতাৰ চাকৰি কৰিছিলো, দেখিছিলো কটনৰ প্ৰফেচৰবোৰৰ কিমান সন্মান। এনে অনুভৱ হয় কটনৰ প্ৰফেচৰ খিনিয়েই অসমৰ শিক্ষাক প্ৰতিনিধিত্ব কৰি আছে। কটনৰ মানুহখিনিয়ে আকৌ ইনফ’চিচত ইমানদিনে মই ডাঙৰ মানুহ বুলি ভাৱি থকা এজনকো চিনি নাপাই। মোৰ ইচ্ছা জাগিল কটন কলেজতে স্থায়ীভাৱে চাকৰিটোৰ ব্যৱস্থা কৰা। কটনৰ চাকৰিটো এৰি মিজোৰামৰ ইকফাই বিশ্ববিদ্যালয়ত চাকৰি কৰিলো, নিজৰখনৰ লগতে অন্যান্য বিশ্ববিদ্যালয়ৰ গৱেষক, প্ৰফেচৰ, উপাচাৰ্যক ওচৰৰ পৰা দেখিলো। তেওলোকৰ নিজৰেই এখন বিশাল পৃথিৱী। এনে অনুভৱ হ’ল বিশ্ববিদ্যালয়ৰ প্ৰফেচৰবোৰেই মেইন মানুহ। এনআৰচিত যেতিয়া চাকৰি কৰি আছিলো তেতিয়া বুজিলো ডিচিৰ ওপৰত কোনো নাই। আই,এ,এচ পৰীক্ষা দি ডিচি হ’ব পাৰিলে ক্ষমতা আৰু সুবিধা বহুত। মই যিবোৰ প্ৰফেচৰক ডাঙৰ ডাঙৰ মানুহ বুলি ভাৱিলো তেওলোকক ডিচি এডিচিবোৰে আকৌ চিনিয়েই নাপায়। বিশ্ববেংকৰ প্ৰকল্প এটাত চাকৰিত সোমালো, ইয়াৰে বছবোৰ আকৌ বেলেগ। বহুত লাখ টকা দৰমহা পোৱা, তেওলোকৰ কামৰ লগত মতলব। সন্মুখত বহি থকাজন কিমান ডাঙৰ অ’ফিছাৰ সেয়া তেওলোকৰ বিচাৰ্য নহয়। মই কনফিউজ, সকলোতকৈ ডাঙৰ কোন। অসম ৰাজ্যিক গ্ৰামীণ জীৱিকা অভিযানত যেতিয়া চাকৰি কৰি আছিলো, মোৰ লক্ষ্য কিবা কৰি যদি এচ,পি,এম পোষ্টত চাকৰি এটা পাও। এচ,পি,এম বোৰ ইমান পাৱাৰফুল আৰু প্ৰভাৱশালী যে গাৱঁৰ আত্মসহায়ক গোটৰ মহিলা এগৰাকীয়ে প্ৰায় ৫-৬ টা স্তৰ ছাৰ-বাইদেউ কৰি আহিহে এচ,পি,এমক লগ পাই। পঞ্চায়ত আৰু গ্ৰামোন্নয়নৰ কমিছনাৰ অফিছত যেতিয়া চাকৰি কৰিলো তেতিয়া গম পালো এচ,পি,এম বহুতকে চিনিয়েই নাপায়, কেৱল কমিছনাৰহে ইয়াতে আছল মানুহ। মোৰ ভাইটিয়ে আকৌ ব্যৱসায় কৰে, তাক শুধিলো কমিছনাৰৰ কথা, সি বোলে নামে শুনা নাই।
মই কথাখিনি লিখাৰ উদ্দেশ্য এটা, বিভিন্ন সময়ত কৰ্মক্ষেত্ৰত এনেকুৱা এটা পৰিৱেশ সৃষ্টি কৰি দিয়া হয়যে, সেইজনেই ডাঙৰ মানুহ বা আমিয়েই আমি। কিন্তু, সেই বৃত্তটোৰ পৰা ওলাই আহিলে গম পাই পৃথিৱীখন সম্পূৰ্ণ বেলেগ। আমি নজনাকৈয়ে নিজকে বা বছজনকে বৰমানুহ বুলি ভাৱি লও কিন্তু, প্ৰকৃততে আমি হয় জানো! ৰাজনীতি, সমাজনীতি বা সংগঠনবোৰতো এনেকুৱা হয়। কিন্তু, যিজনে নিজৰ ব্যক্তিগত দক্ষতাৰে প্ৰভাৱ বিস্তাৰ কৰিছে বা ভাল কাম কৰিছে তেওলোক সদায়ে ডাঙৰ মানুহ বা তেওলোক যতেই যায় তাতেই সন্মান পায়।