গাড়ীৰ পৰা চাইকেলত ধৰিছো, এলোপেথিক ঔষধ  এৰি হাৰ্বেল ঔষধ খাইছো, ইংৰাজীত নহয় মাতৃভাষাত কথা কৈ গৌৰৱ কৰিছো, ৰাসায়নিক সাৰ বাদ দি জৈৱিক সাৰ প্ৰয়োগ কৰিছো, গাজৰ-বিলাহীত কৈ কচু-ঢেকীয়াত জুটি পাইছো, লেট-নাইট সোনকালে সামৰি প্ৰাত: ভ্ৰমণৰ মজা লৈছো, বেছিদিন নাই আমি কম- চহৰৰ ফ্লেট এৰি গাঁৱত মাটি কিনিছো । পৃথিৱীখন চাগে অলপ সোঁতৰ বিপৰীতে চলিব আৰম্ভ কৰিছে । উন্নত দেশ সমূহত ইতিমধ্যেই এনেকুৱা ট্ৰেণ্ড আৰম্ভ হৈছে, উন্নয়নশীল দেশ সমূহতো চাগে পৰৱৰ্তী ২০-২৫ বছৰত এনেকুৱা দিন আৰম্ভ হ’ব । লকডাউনৰ সময়ছোৱাত দেখিবলৈ পোৱা গৈছে বহুতে চাইকেল চলাব আৰম্ভ কৰিছে আৰু এই সংখ্যা লাহে লাহে বাঢ়িব ধৰিছে, ঠিক তেনেদৰে আজিকালি থলুৱা কচু, কলডিল, কোমোৰাকে আদি কৰি জৈৱিক সাৰ ব্যৱহাৰ কৰি উৎপাদন কৰা পাচলিৰ চাহিদাৰ্বৃদ্ধি পাইছে । মৰ্নিং-ৱাক কৰা মানুহৰ সংখ্যাও লাহে লাহে বাঢ়িব ধৰিছে আৰু মানুহবোৰ স্বাহ্যসচেতন হোৱাটো বহুত প্ৰয়োজনীয় হৈ পৰিছে । সেয়েহে কৈছো চহৰত ফ্লেট কিনক, কিন্তু গাঁৱৰ মাটি বিক্ৰী নকৰিব, নহ’লে এদিন অনুতাপ কৰিব লাগিব; বিদেশী ভাষা শিকক, কিন্তু মাতৃভাষাক বাদ দি নহয়; দামীতকৈ দামী গাড়ীখন কিনক, কিন্তু খোজকাঢ়িবলৈ নেৰিব।