‘If you want to go fast, go alone; if you want to go far, go together.’ অৰ্থাৎ, যদি সোনকালে আগবাঢ়িব বিচাৰিছা তেতিয়াহ’লে অকলে খোজ দিয়া আৰু যদি দূৰলৈ খোজ দিব বিচাৰিছা তেতিয়াহ’লে একেলগে খোজ দিয়া। অলপ দকৈ যদি ভাৱি চাই এই কথাষাৰ আজিৰ প্ৰতিযোগিতাৰ পৃথিৱীত বহুত গুৰুত্বপূৰ্ণ। আমি সকলোৱে সফল হ’ব বিচাৰো, জীৱনত উন্নতি কৰিব বিচাৰো, প্ৰভাৱশালী হ’ব বিচাৰো কিন্তু একেলগে খোজ দিব নিবিচাৰো। অকলে অকলে আগবাঢ়িলে আপুনি স্পীড ল’ব পাৰিব কিন্তু বহুত বেছিদূৰ আগবঢ়া অসুবিধা হ’ব। আমি যদি জীৱনত দীৰ্ঘস্থায়ী সফলতা অৰ্জন কৰিব বিচাৰো তেন্তে এজনে আনজনৰ হাতত ধৰি আগবাঢ়িবই লাগিব। অকলে কাম কৰিবলৈ সহজ নহয়, তাতে পিছফালে টনা মানুহৰ সংখ্যা বহুত বেছি।
মোৰ ব্যক্তিগত অভিজ্ঞতাৰে ক’ব বিচাৰো, মই যদি বিভিন্নজনৰ সহায় নাপালোহেতেন তেতিয়াহলে মই হয়তো কৰবাত হেৰাই থাকিলো হয়। বিভিন্ন সময়ত বিভিন্নজনে আমাক সহায় আগবঢ়াই- কেতিয়াবা বন্ধু, কেতিয়াবা সতীৰ্থ অথবা কেতিয়াবা অচিনাকি বাটৰ বাটৰুৱা। নিজৰ ফ্ৰেইণ্ড নেটৱৰ্ক যদি ভাল হয় সি বিভিন্ন সময়ত বিভিন্নধৰণে সহায়ক হয়। কোনেও কাৰো বিনিময় নিবিচাৰে, নিজৰ ক্ষতি কৰি কোনেও সহায় নকৰে, আনৰ সফলতাত আমি দুখী নহও, শেষত সকলোৰে লাভ হয়।
মই যদি এটা চাকৰিৰ খবৰ পাইছো, মোৰ লগতে আন দুজনকো দিছো। কেতিয়াবা যদি হতাশা আহিছে কোনোবাজনে আহি কাষত থিয় দিছে। মোৰ উন্নতিত সিহতৰ দুখ নালাগে, আৰু সিহতৰ উন্নতিয়ে আমাকো সুখ দিয়ে। এজনে পিছলি পৰিব বিচাৰিলে আনজনে হাতখন মেলি দিছে, পাৰিলে ঠেলা এটা মাৰি ওপৰলৈ উঠাই দিছে। প্ৰফেচনেল লাইফত বা ব্যৱসায়ীক জীৱনত যদি এটা ভাল মানুহৰ নেটৱৰ্ক থাকে তেতিয়া বাট বুলিবলৈ সহজ হৈ পৰে।
আমাৰ আকৌ কেকোৰা জাতি বুলি এটা বদনামো আছে, আনৰ উন্নতি দেখিব নোৱাৰো, পিছফালৰ পৰা চুৰি মাৰো বুলি। ব্যৱসায়ৰ ক্ষেত্ৰত কাষৰজনে উন্নতি কৰিলে আমি সুখী হ’ব লাগে। পিছফালৰ পৰা টানিলে আনজনৰো ক্ষতি আৰু নিজৰো ক্ষতি হয়। আপুনি যদি কাৰোবাক নিস্বাৰ্থভাৱে সহায় কৰিছে, আপুনিও কেতিয়াবা কাৰোবাৰ পৰা সহায় পাব। বহুতেই একেলগে কাম কৰি সফল হোৱা উদাহৰণ হিচাপে মাৰোৱাৰী লোকসকলৰ উদাহৰণ দিয়ে, কেনেদৰে এজনে আনজনক সহায় কৰি সকলোৱে উন্নতিৰ জখলা বগাইছে।
যৌথ পৰিয়ালৰ ধাৰণা লাহে লাহে নোহোৱাই হ’ব ধৰিছে। ভাৱকছোন, পৰিয়ালৰ সকলো মানুহ যদি বেলেগ বেলেগ নহয় একেলগে থাকিলেহেতেন খৰছ কিমান কমিল হেতেন, সৰু ঘৰ বনোৱাতকৈ ডাঙৰ ঘৰ সাজিব পাৰিলেহেতেন, দুবিঘা মাটিত খেতি কৰাতকৈ ৮-১০ বিঘা মাটিত খেতি কৰিব পাৰিলেহেঁতেন। আমি কিছুমান সৰু সৰু কাৰণত যৌথ পৰিয়ালত একেলগে থাকিব নোৱাৰা হ’লো।
মই যেতিয়া চাকৰি বিচাৰি আছিলো, মোক বন্ধু এজনে চাকৰিৰ খবৰ দিছিল। বক্তৃতা দি ভালপোৱা মোক মোৰ চিনাকী মানুহবোৰেই এখন মঞ্চ দিছিল। এনেকৈয়ে আগবাঢ়িছো আমিবোৰ। আপুনিও যদি সফলতাৰ বাট বুলিব বিচাৰে, দুৰ্বল সময়ত কোনোবাজন কাষত থকাতো বিচাৰে, ভাল মানুহৰ এটা নেটৱৰ্কত থাকক। কাষত থকা বেয়া মানুহবোৰৰ লগত দূৰত্ব বজাই ৰাখক।