There is no shortcut way of success -মই অন্তৰেৰে বিশ্বাস কৰা এটা সত্য। পৃথিৱীত চাগে এনে উদাহৰণ বহুত কম আছে বা নোলাব যিয়ে বিশেষ কষ্ট নকৰাকৈ কম সময়তে সফলতা লাভ কৰিছে। ‘ইজি মানি’ আৰু ‘আনৰ আগত নিজকে বেছি দেখুওৱা প্ৰৱণতা’ এয়া আজিৰ সময়ত এক সামাজিক সমস্যালৈ ৰূপান্তৰিত হৈছে। বেছিভাগেই আজিকালি ‘ইজি মানি’ বিচাৰে, বিশেষ কোনো কষ্ট নকৰাকৈ লাখ-লাখ, কৌটি-কৌটি টকাৰ মালিক হ’ব বিচাৰে। চোছিয়েল মিডিয়া সমূহেও আজিকালি ইয়াত কেতিয়াবা প্ৰভাৱ পেলাই। চোছিয়েল মিডিয়াৰ সকলো ভিডিঅ’ বা বিজ্ঞাপনকে আমি সচা বুলি ধৰি লও। সচা-মিছাৰ পাৰ্থক্য আমি ধৰিব নোৱাৰো, একে ৰাতিতে কৌটিপতি হোৱাৰ সপোন দেখাই, দামী গাড়ী, বিদেশ ভ্ৰমণৰ টোপ দেখুৱাই। মই নিজেও বহুতবাৰ ইয়াৰ টাৰ্গেট হৈছো যদিও, লোভ সম্বৰণ কৰি কৌটিপতি হোৱাৰ সপোন পৰিত্যাগ কৰিছো। পইচা মোকো লাগে, বহুত পইচা লাগে কিন্তু, এইটোতো সাধাৰণ জ্ঞান থকা সকলোৱে বুজি পোৱা উচিত যে পইচা দুগুণ হোৱা বা একমাহতে বহুত ৰিটাৰ্ণ দিব পৰাকে পৃথিৱীত কোনো ৰাস্তা নাই। এনে হোৱা হ’লে দেশত দৰিদ্ৰতাই নাথাকিলেহেতেন।
শ্বেয়াৰ ট্ৰেডিঙ বৈধ আৰু আইনসন্মত, আপুনি কোম্পেনীৰ শ্বেয়াৰ কিনিব পাৰে আৰু বেচিব পাৰে, সাধাৰণ ভাষাত কোম্পেনীৰ লাভ হ’লে আপোনাৰ লাভ, কোম্পেনীৰ লোকচান হ’লে আপোনাৰ লোকচান। কিন্তু, আজিকালি অনলাইন ট্ৰেডিঙৰ নামত বেলেগৰ হৈ বেলেগেযে পইচা লগাই, তাত লাভৰ কথাটো হয়তো ঠিকেই কয় কিন্তু লোকচানো যে হ’ব পাৰে সেই কথাটো নকয়।
বৰ্তমানৰ ট্ৰেণ্ডিং হৈ থকা বিষয়টোৰ প্ৰসংগ টানি আনি কৈছো, তেওঁলোকে হঠাতে যিধৰণে লাইফ ষ্টাইল সলনি কৰিলে সেয়া মানুহৰ চকুত পৰি গ’ল। মানুহৰ উপাৰ্জন বাঢ়িবই পাৰে কিন্তু, সেয়া যদি হঠাৎ হৈ যায় মানুহৰ সন্দেহ বাঢ়ে আৰু এদিন এদিন নহয় এদিন তাৰ ৰহস্য উদ্ধাৰ হ’বই। আজি সামাজিক মাধ্যমত অধিক চৰ্চিত হৈছে তেওলোকৰ লাইফষ্টাইলৰ পৰিৱৰ্তনৰ বাবেহে, বিয়াৰ অগতানুগতিক জাকজমতাৰ বাবেহে কিন্তু, কেনেকৈ পইচা হেৰেফেৰ কৰিলে বা কেনেকৈ আনৰ ধন সংগ্ৰহ কৰি ওভোটাই দিব নোৱাৰিলে সেয়া বহুত বেছি চৰ্চা হোৱা নাই। নিজকে জাহিৰ কৰা স্বভাৱ, বেনামী প্ৰতিযোগীতাত নামি নিজকে ধনী বুলি প্ৰতিপন্ন কৰাৰ স্বভাৱ অথবা নিজৰ শিপাডাল পাহৰি যোৱাৰ প্ৰৱণতাই নিজৰে ক্ষতি কৰে। অলপ সময়ৰ বাবে সুখ দিলেও ই দীঘলীয়া সময়ৰ বাবে নাথাকে।
ফেচবুকত ১০০০ ফল’ৱাৰ থকা মানে চেলেব্ৰেটি নহয়, সোণৰ চেইন পিন্ধা মানেই ধনী নহয় অথবা এদিনত লাখ টকা আহিলে এমাহত ৩০ লাখ টকা উপাৰ্জন নহয়। ব্যৱসায় কৰি কৌটিপতি হওক, নেশ্যনেল ষ্টক একচেঞ্জ বা বোম্বে ষ্টক একচেঞ্জত ট্ৰেডিং কৰি লাখ টকা উপাৰ্জন কৰক তাত কবলগীয়া একো নাই, নিজৰ উপাৰ্জনেৰে নিজৰ জীৱন উপভোগ কৰক নিজৰ বাবে আনক দেখাবলৈ নহয়। নিজেও ভালে থাকিব- সমাজখনো ভালে থাকিব।