ইনফ’চিচ (Infosys) কোম্পেনীত জইন কৰাৰ পিছতে প্ৰায় ৪৫ দিনৰ ট্ৰেইনিং লব লগা হৈছিল মহীশূৰ (Mysore) ৰ ট্ৰেইনিং চেণ্টাৰত । তাত আমাক খেলৰ মাধ্যমেৰে এটা নীতি শিক্ষা দিছিল । এখন বগা কাগজত কলা ৰঙৰ মাৰ্কাৰ কলমেৰে মাজত এটা দাগ দিয়া আছিল, ট্ৰেইনাৰ জনে আমাক কাগজখন দেখুৱাই সুধিছিলে- কি দেখিছা ? আমি সকলোৱে সেই কলা দাগটোৰ কথা কৈছিলো, ট্ৰেইনাৰ জনে বাৰে বাৰে সুধিছিল-কিনতু আমাৰ উত্তৰ একেই আছিল । ট্ৰেইনাৰ জনে কৈছিল- তোমালকে কাগজ খনৰ দাগ নিদিয়া বাকী বগা অংশ দেখা পোৱা নাই নেকি ? আমি সাধাৰণ মানুহৰ মনোবিজ্ঞান তেনেকুৱাই । আপুনি ১০ টা হয়তো ভাল কাম কৰিছে, কিনতু ১ টা যদি ভুল কামকৰে সেইটোহে আমাৰ চকুত পৰে । এটা সৰু উদাহৰণ যিখন দেশত বহু মানুহৰ ঘৰত শৌচাগাৰ নাছিলে, তেওঁলোকৰ বাবে চৰকাৰী ভাৱে শৌচাগাৰ বনোৱা হ’ল, ১০০ টা ব্যৱহাৰ উপযোগীকৈ বনালে, এটা ভাঙি পৰিল; আমি ভাঙি পৰাটোৰ কথাহে আলোচনা কৰিলো । চৰকাৰে নকৰা কামবোৰ আমি দেখা পাওঁ, কিনতু কৰা কামবোৰ আমাৰ অগোচৰে থাকি যায় । আপুনি কোনোবা আত্মীয় বা বন্ধুক পাৰ্য্যমানে প্ৰয়োজনত সহায় কৰি আহিছে, এদিন আপুনি হয়তো সহায় কৰিব নোৱাৰিলে- সেই কথাটোৱে তেওঁ বেলেগক গৈ হয়তো কৈ ফুৰিব । আপুনি অফি’ছত জৰুৰী সময়ত কামৰ বাবে ৫ টা বজাৰ পিছতো থাকি নিজৰ ব্যক্তিগত সময়ৰ পৰা সময় দি হয়তো কাম কৰি দি আছে, কিন্তু এদিন আপোনাৰ অফিছলৈ আহোতে দেৰি হলে আপোনাক বছে কথা শুনাব, যিজন বছে কিনতু আনদিনা আপোনাক প্ৰশংসা কৰা নাছিল । সেয়া আমাৰ মানসিকতা, আমাক ট্ৰেইনিঙত শিকাইছিল, আমি আমাৰ দৃষ্টি সলনি কৰিব লাগিব তেতিয়া দেখিব অধিক সংখ্যক মানুহে ভাল আৰু সৎ, পৃথিৱীখন আপুনি ভৱাতকৈ বহুত বেছি সূন্দৰ । যি গৰাকী বন্ধুৰ লগত আপুনি উঠি-বহি ডাঙৰ হ’ল, যিয়ে আপোনাৰ লগত ছাঁৰ দৰে লাগি আছিল, এদিন কিবা মতানৈক্য হওঁতেই তেওঁক আপুনি শতৰু জ্ঞান কৰা হ’ল । ভাল কামৰ প্ৰশংসা কৰক, ভাল দিনবোৰ মনলৈ আনক, দেখিব সকলোবোৰ ভাল হ’ব । সেই নীতি শিক্ষাই জীৱনত আজিওঁ বহুত সহায় কৰে আৰু ধনাত্মক অনুভৱ (Positive Feel) এটা দিয়ে ।