ইংৰাজীত এষাৰ কথা আছে, “A Problem Shared is a Problem Halved” বা সমস্যা যদি কাৰোবাৰ লগত আলোচনা কৰা হয় তেন্তে আধা সমস্যা সমাধান হৈ যায় । প্ৰত্যেক গৰাকী ব্যক্তিৰে জীৱনত সমস্যা থাকে, কাৰোবাৰ হয়তো গভীৰ কাৰোবাৰ হয়তো সাধাৰণ । দৰিদ্ৰ কৃষক জনৰ পৰা আৰম্ভ কৰি কৌটিপতি ব্যৱসায়ী জনলৈ, ঘৰৰ গৃহিনী জনীৰ পৰা আৰম্ভ কৰি মন্ত্ৰী-বিধায়িকা গৰাকীলৈ । কাৰোবাৰ যদি আৰ্থিক সমস্যা, কাৰোবাৰ আকৌ পাৰিবাৰিক সমস্যা, কোনোবাৰ ঘৰখন বেমাৰে জুৰুলা কৰিছে, কাৰোবাৰ পুতেকে মদ খাই ঘৰত অশান্তি কৰিছে । কাৰোবাৰ অফিছৰ বছ ভাল নহয়, কাৰোবাৰ আকৌ চাকৰি ঘৰৰ কাষত নহয়, কোনোবা জন ধাৰত ডুব গৈছে, কোনোবা জনে আকৌ প্ৰেমত হাবু-ডুবু খাইছে ইত্যাদি ইত্যাদি । সমস্যা ভিন্ন, কিন্ত থকাত সকলোৰে আছে । আপোনাৰ যদি সমস্যা আছে, যদি কিবা কথাই আমনি কৰি আছে তেন্তে কাৰোবাৰ লগত আলোচনা কৰি লওক । তেওঁ হয়তো আপোনাৰ বন্ধু হ’ব পাৰে বা সম্পৰ্কীয় হ’ব পাৰে অথবা কোনোবা অচিনাকী লোক হ’ব পাৰে । আপুনি আশা নকৰিব, তেওঁ আপোনাক সমাধান দিব, কিন্তু আপুনি যেতিয়া মুক্তমনে কাৰোবাৰ লগত সমস্যাটো আলোচনা কৰিব তেতিয়া সমস্যাটোৰ আধা সমাধান হৈ যাব- সেয়া নিশ্চিত থাকক । কেতিয়াবা কিছুমান ব্যক্তিগত কথা চিনাকী মানুহক ক’ব নোৱাৰি, কিন্তু মানুহজন যদি দূৰ-দূৰলৈ কোনো সম্পৰ্কীয় নহয়, হয়তো ফেচবুক ফ্ৰেইণ্ড বা অন্য কোনোবা অল্প পৰিচিত ব্যক্তি তেন্তে হয়তো বহু কথাই দ্বিধাহীন ভাৱে কব পাৰি । কাৰ লগত আলোচনা কৰিছে সেয়া বিশেষ গুৰুত্বপূৰ্ণ নহয়, আলোচনাৰ পিছত সেয়া ভাৱিওঁ থাকিব নালাগে । পাশ্চাত্যৰ দেশ সমূহত বহুতে কাউন্সেলৰৰ কাষত যায়, য’ত মন খুলি কথা কব পাৰি আৰু কাউন্সেলৰ জনেওঁ মনোযোগ দি শুনে । সমস্যা আছে যদি সমাধানো আছে, জীৱন যাপন নহয়- উদযাপন কৰক ।